Wednesday, July 13, 2016

ညဥ့်ငှက်မလေးသို့တမ်းချင်း (မင်းဒင်)

မင်း ဒင်


(၁)
ဤစာ၏အစတွင်၊ရိုးသားစွာဝန်ခံလိုသည်မှာ၊ကျွန်တော်သည်ပြည့်တန်ဆာ
များနှင့်မကင်းခဲ့ဟူသောအချက်ဖြစ်၏။

ကျွန်တော့်ဇာတိရွာတွင်ယခုအချိန်အထိပြည့်တန်ဆာရှိသည်ဟု ကျွန်တော်မကြားဖူးခဲ့ချေ။ငယ်စဉ်ကကျွန်တော်အခြေချကြီးပြင်းခဲ့သော၊
ရန်ကုန်မြို့ဆင်ခြေဖုံးရပ်ကွက်တခု၏လမ်းငယ်ထဲတွင်..၊ “အဲဒါဖာသည်လေ”ဟုအရပ် ကမေးငေါ့ကြသော၊မိန်းကလေးတဦးကို၊ အထူးအဆန်းသဖွယ်၊ကျွန်တော်ငေးမောကြည့်ခဲ့ဖူးသည်။
အကြိမ်ကြိမ်ခိုးချောင်ခိုးဝှက်ချောင်း၍ကြည့်ဖူးခဲ့သည်။

အချိန်တန်အရွယ်ရောက်လူလားမြောက်၍အတောင်အလက်စုံသည့်အခါ၊
ဘဝမျိုးစုံတွင်ကျင်လည်ခဲ့သောကျွန်တော်သည်၊ယင်းကိစ္စဖက်၌
အားသန်သည်မဟုတ်သော်ငြား၊အပေါင်းအသင်းကိုခုံမင်စိတ်၊
လက်တည့်စမ်းလိုစိတ်၊ယောက်ျားမှန်လျှင်စုံရမည်ဟူသောအလွဲမာနတို့ဖြင့်၊
ညဥ့်ငှက်ခေါ်ပြည့်တန်ဆာတို့စံပျော်ရာ၊ဘုံဌာနအသီးသီးသို့
ကြိမ်ဖန်များစွာရောက်ရှိကျွမ်းဝင်ခဲ့ဖူးလေသည်။
စင်္ကာပူ၊မလေးရှား၊ယိုးဒယား၊ဂျပန်၊စသည့်ရေခြားမြေခြားတိုင်းပြည်များရှိ
အဆိုပါပြည့်တန်ဆာတို့ကျင်လည်စုဝေးရာအရပ်များသို့၊ကာယကံမြောက်
မဟုတ်သည့်တိုင်၊စူးစမ်းစပ်စုလိုစိတ်ဖြင့်၊အကြိမ်ကြိမ်စနည်းနာခဲ့ဖူး၏။
ယခုမူအသက်အရွယ်ကိုထောက်၍လည်းကောင်း၊ရင့်ကျက်လာသော
ဆင်ခြင်တုံတရားအရလည်းကောင်း၊ထိုသို့သောနေရာများသို့ခြေဦး
မလှည့်ခဲ့သည်မှာ၊နှစ်ပေါင်းများစွာကြာခဲ့လေ ပြီ။
ယင်းပြည့်တန်ဆာဝန်းကျင်တို့တွင်ကျွမ်းဝင်ခဲ့စဉ်အကြိမ်ကြိမ်တိုင်းလိုလို၌
လည်းကောင်း၊ဝေးကွာခဲ့သည့်တိုင်၊တခါတရံပြည့်တန်ဆာနှင့် ပတ်သက်သော၊ထူးခြားသတင်း၊အဖမ်းအဆီးသတင်းတို့ကို၊
ဖတ်ရှုကြားသိရသည့် အခါတို့တွင်လည်းကောင်း၊ ကျွန်တော်၏စိတ်အစဉ်တွင်မေ့ဖျောက်ပစ်၍မရနိုင်သည့်၊
ညဥ့်ငှက်မလေးတယောက် ၏အကြောင်းခြင်းရာသည်၊ ကျွန်တော့်ခေါင်းထဲတွင်၊ရုပ်ရှင်ဇာတ်လမ်းများ၌ဇာတ်ကြောင်းပြန်သကဲ့သို့၊
အစီအရီအလိုလိုပေါ်လာတတ်မြဲဖြစ်လေသည်။
(၂)
လွန်ခဲ့သောတလခန့်က၊ထိုင်းနိုင်ငံဖူးခက်မြို့မှ၊မိတ်ဆွေထိုင်းရဲအရာရှိတဦး၊
ကျွန်တော့်အိမ်သို့ပေါက်ချလာသည်။သူသည်ထိုင်းကျေးလက်တွင်ကြီးပြင်း
ခဲ့သူဖြစ်ပြီး၊ဖူးခက်သို့ရာထူးတိုးပြောင်းရွေ့လာသူဖြစ်၏။သူက၊ဖူးခက်မှ
နာ မည်ကျော်ဇိမ်ခန်းများသို့လိုက်ပို့ရန်၊ရင်းနှီးခင်မင်သူ တယောက် အနေဖြင့်နားပူနားဆာလုပ်သည်။သူ့အသက်မှာလေးဆယ်ကျော်
ဝန်းကျင်ဖြစ်၍၊အတန်ငယ်အရွယ်တင်နေသောကျွန်တော့်ကိုသူနှင့်
သက်တူရွယ်တူဟုထင်မှတ်နေဟန်ရှိသည်။
မည်သို့ပင်ဆိုစေ၊ဖူးခက်ဟူသောနိုင်ငံတကာခရီးသွားတို့ကျင်လည်ရာ
အရပ်တွင်၊ဥရောပသားအသက်ခုနှစ်ဆယ်ကျော်တို့နှင့်အသက်နှစ်ဆယ်
ဝန်းကျင်၊ထိုင်းပျိုဖြူတို့ဒွိယံဒွိယံပေါင်းဖက်လေ့ရှိကြသည်မှာဆန်း ကြယ်လှသည်တော့မဟုတ်ချေ။
အလိမ်မာနည်းသုံး၍ကျွန်တော်ငြင်းပယ်သော်ငြား၊သူကခင်မင်ရင်းစွဲရှိသူ
ပီပီ၊ကျားပိန်တွယ်တွယ်၍၊နားဆော်ဖန်များလတ်သော် နောက်ဆုံးတွင်
ကျွန်တော်ခေါင်းငြိမ့်လိုက်မိသည်။
ဤသို့လျှင်၎င်းရဲအရာရှိ၊သူ၏တပည့်နှစ်ဦးနှင့်ကျွန်တော်၊စုစုပေါင်းလေးဦး
ပါဝင်သည့်တပ်စိတ်သည်ဖူးခက်မြို့လယ်ခေါင်ရှိ (Fantesy)ဟူသော ဧရာမဆိုင်းဘုတ်ကြီးတင်ထားသည့်ဇိမ်ခန်းဆီသို့၊ချီတက်ခဲ့ကြရာ၊
ထိုနေ့ညနေခြောက်နာရီဝန်းကျင်တွင်ဆိုက်မြိုက်စွာရောက်ရှိကြ၏။
ပြင်ပပေါက်ဈေးထက်နှစ်ဆကျော်ဈေးမြင့်သော၊ဂျော်နီလမ်းလျှောက်
အစိမ်းရောင်တလုံးကို၊ဖွင့်လျက်၊တပက်စီခန့်ဖြင့်၊ပဏာမတီးလုံးပျိုးနေစဉ်မှာပင်၊
ဆိုင်ဝန်ထမ်းတဦးက၊ညဥ့်ငှက်ကလေးများကိုလေ့လာကြည့်ရှုတော်မူပါမည့် အကြောင်းခယတိုးလျှိုးလာသည့်အခါ၊ကျွန်တော်တို့လေးဦးသားတစုံတရာ
တိုင်ပင်ခြင်းမရှိပဲ၊ပြိုင်တူလက်ခံသဘောတူကြကာ၊ဝန်ထမ်းဦးဆောင်ခေါ်
လေရာသို့၊လိုက်ပါခဲ့ကြသည်။စင်စစ်ထိုနေရာသို့ကျွန်တော်ရောက်ခဲ့ဖူး
သည်ဖြစ်၍၊နေရာစိမ်းကားမဟုတ်ချေ။
(၃)
မြေညီထပ်မှကြောင်လိမ်လှေခါးအတိုင်းတက်သွားလတ်၍ပထမထပ်သို့
ရောက်သော်၊ရှေ့မျက်နှာစာတွင်၊ဒိုးယိုပေါက်မြင်နိုင်သည့်မှန်ကာရံထားသော၊
အခန်းငယ်လေးများရှိနေသည်။ထိုအခန်းငယ်လေးများထဲတွင်၊
အသက်နှစ်ဆယ်ကျော်၊သုံးဆယ်ထက်မပိုသည့်လှပျိုဖြူတို့သည်
၊ခေတ်မီအလှပြင်ပစ္စည်းအသုံးအဆောင်အစုံအလင်ဖြင့်၊လိမ်းကျံခြယ်သရင်း
၊ကြာမျက်လုံးတို့နှင့်ကြာပစ်ရင်းဖောက်သည်တို့ကိုမြူဆွယ်နေလေသည်။
အများစုကားဖူးခက်ရှိတက္ကသိုလ်ကြီးတခုမှကျောင်းသူများဟုဆိုပါ၏။
ကျောင်းစားရိတ်နှင့်တဝမ်းတခါးအလို့ငှာ၊ဤဘဝတွင်ဤပုံဤနှယ်လှုပ်ရှား
ကျင်လည်ကြသည်ဟုဆိုပါသည်။
အဆိုပါပရဝုဏ်အတွင်းရှိသီးခြားအခန်းများတွင်၊သူကလေးတို့နှင့်
တနာရီသာသာ၊ရွှေလည်တကြိမ်တွဲလိုပါက၊ထိုင်းဘတ်နှစ်ထောင်ဖြစ်၍
၊ပြင်ပသို့ညအိပ်ခေါ်ယူသည့်နှုန်းမှာထိုင်းဘတ်လေးထောင်ဈေးပေါက်ပါ၏။
လိုရင်းကိုအတိုချုံရလျှင်၊သူတို့သုံးယောက်ရွေး၍ခေါ်သည်။ကျသင့်ငွေကို
ကျွန်တော်ရှင်း၏။ဖွင့်လက်စပုလင်းကိုညဥ့်ငှက်မလေးများကပါ၊တတပ်တအား
ကူညီအားပေးကြပြီး၊၊ညဆယ်နာရီခန့်တွင်လူစုခွဲကြသည်။
လူစုမခွဲခင်ညဥ့်ငှက်မလေးများက၊ကျွန်တော့်အတွက်အဖော်စပ်ပေး
ရန်ကြိုးပမ်းကြသော်ငြား၊ကျွန်တော့်အသက်အမှန်နှင့် “ဖမ” မြန်မာ
ဟုဆိုလိုက်သောအခါ၊သူတို့မည်သို့သဘောပေါက်ကြသည်မသိ။
နောက်ဆက်တွဲအသံထွက်မလာတော့ချေ။
နေအိမ်ရှိရာသို့၊တကိုယ်တည်းကားမောင်း၍ပြန်လာချိန်တွင်၊ထိုင်းညဥ့်ငှက်
မလေးများ၏(မရိုသေ့စကား)ဖာတန်းစေ့ပျော်ရွှင်လွတ်လပ်မှုတို့ကို
စဉ်းစားမိသည့်အခါ၊ကျွန်တော်မေ့မရနိုင်ခဲ့သော၊တရံတခါဆီမှ
ကျွန်တော်ကြုံခဲ့ဖူးသည့်၊ပြည့်တန်ဆာမလေး၏အကြောင်းသည်၊
ကျွန်တော့်စိတ်အစဉ်တွင်ရုတ်ခြည်းပေါ်လာပြန်လေသည်။
ကြာတော့လည်းကြာခဲ့ပါလေပြီ။လွန်ခဲ့သောအနှစ်သုံးဆယ်ဝန်းကျင်
ခန့်ကဖြစ်၏။
နေရာကားပျဉ်းမနားမြို့ဖြစ်၍၊ထိုစဉ်ကကျွန်တော်သည်သစ်ကုန်သည်
ဘဝတွင်ကျင်လည်နေသူဖြစ်ရာ၊သစ်ထုတ်လုပ်ရေးလုပ်ငန်းအကြီး
အကျယ်စည်ပင်ခဲ့သောပျဉ်းမနားမြို့သို့၊အခေါက်ပေါင်းမရေ
တွက်နိုင်အောင်ရောက်ခဲ့၏။ထိုစဉ်ကပျဉ်းမနားတွင်အထင်ကရ ဟိုတယ်၊တည်းခိုခန်းတို့မရှိသေး။ပျဉ်းမနားကန်တော်ကြီးအနီးရှိ
တခုသော တည်းခိုခန်းငယ်မှာကျွန်တော် စတည်းချလေ့ရှိ၏။
နေအိမ်ကိုအခန်းငယ်များဖွဲ့ထားသည်အဆိုပါတည်းခိုခန်းတွင်၊ ကျွန်တော်မေ့မရသောညဥ့်ငှက်မလေးကိုတွေ့ဆုံခဲ့ခြင်းဖြစ်လေသည်။
(၄)
တခုသောညဥ့်တွင်ဖြစ်၏။ညဆယ်နာရီခန့်ရှိလေပြီ။ထုံးစံအတိုင်း
ပျဉ်းမနားမြို့တွင်းရှိ၊တခုသောစားသောက်ဆိုင်မှာ၊လုပ်ဖော်ကိုင်ဖက်များနှင့်
ဝိုင်းဖွဲ့ခဲ့ပြီး၊ဇရက်မင်းစည်းစိမ်အပြည့်ဖြင့်၊တည်းခိုခန်းရှိရာသို့
ကျွန်တော်ပြန်ရောက်လာခဲ့သည်။
ရီဝေဝေဖြစ်နေသည့်တိုင်အိပ်ချင်စိတ်မရှိသေးသဖြင့်၊ဧည့်ခန်းစားပွဲဝိုင်းမှ
နောက်မှီကုလားထိုင်တလုံးပေါ်တွင်ထိုင်ရင်း၊နောက်တနေ့အလုပ်ဇယား
ကိုတွေးနေစဉ်မှာပင်၊လေအဝှေ့၌၊ရုတ်တရက်လှုပ်ယမ်းသွားသည့် ခန်းဆီးလွှာကြားမှ၊လူရိပ်တခုကိုဖျတ်ကနဲမြင်လိုက်ရသည်။
ထိုလူရိပ်သည်မိန်းမပျိုတဦးဖြစ်မှန်းကျွန်တော်ဒက်ကနဲသိလိုက်သည်။
အံ့သြလွန်းမကအံ့သြလွန်းလှသဖြင့်၊ကျွန်တော်ခေါင်းနပန်းကြီးသွားသည်။
အကြောင်းမှာသူမသည်မွေးကင်းစကလေးငယ်တဦးကိုပွေ့ပိုက်ထားသည့်
ကိုယ်နေဟန်ထားဖြစ်သောကြောင့်ကျွန်တော်ချက်ချင်းသိလိုက်ခြင်းပေတည်း။
စင်စစ်သူမကိုထိုနေ့နံနက်၊အဆိုပါတည်းခိုခန်းသို့ရောက်စကပင်
သတိပြုမိပြီးဖြစ်ပါ၏။သူမ၏အဝတ်အိတ်ခပ်နွမ်းနွမ်းအငယ်စားကို
ထောက်ရှုယုံဖြင့်သူမသည်ဝေးလံသောမြို့ပြမှမဖြစ်တန်ရာ။
ပျဉ်းမနားအနီးတဝိုက်ရှိ၊ရွာငယ်ကျေးလက်တခုခုမှဖြစ်တန်ရာသည်။
သူမပွေ့ထားသောကလေးငယ်မှာတစ်လသား ကျော်အရွယ်နီတာရဲလေး
ပင်ရှိသေး၏။သူမ၏အိမ်သားခင်ပွန်းသည်အဘယ်အရပ်တွင်ကျန်ခဲ့လေ
သနည်း။သူ့အိမ်သားနှင့်ဒေါသအလျောက်၊မာန်အလျောက်၊စိတ်ဆိုးစိတ်ကောက်လျက်၊ရင်သွေးငယ်ကိုချီပွေ့ကာ၊နေအိမ်မှ၊ဇွတ်တရွတ်ဆင်းလာလေသလော။
ထိုထိုသောအတွေးများဖြင့်၊ထိုမနက်ကပင်သူမကိုကျွန်တော်ငေးကြည့်ခဲ့မိပါ၏။
သူမသည်အသက်နှစ်ဆယ့်ငါးနှစ်ဝန်းကျင်၊ရုပ်ရည်အသင့်အတင့်ဖြစ်၍
မီးနေသည်မိန်းမတဦး၏ရုပ်သွင်ထင်ရှားလျက်ပင်ရှိသေး၏။
ခန်းဆီးလွှာခပ်ပါးပါးကိုကျော်ဖြတ်၍ကျွန်တော်မသိမသာအကဲခတ်နေစဉ်မှာပင်၊သူမသည်တခုသောအခန်းကို တိုးညှင်းစွာခေါက်၏။ အခန်းတံခါးပွင့်လာသည်။ထိုအခန်းတွင်းသို့သူမဝင်သွားပြီးအခန်းတံခါးပိတ်
သွားပြန်သည်။နာရီဝက်မရှိတရှိတွင် သူမသည်ကလေးငယ်ကို ပိုက်လျက်ပြန်ထွက်လာပြန်သည်။ထိုနောက်..၊နောက်တခန်း။
ဘုရားရေ။ကျွန်တော့်ရင်ဘတ်ကိုလက်ဖြင့်အသာဖိရင်း..ဘုရားတမိသည်။
(၅)
ညစ်ညူးနေသောစိတ်ဖြင့်ကျွန်တော့်အခန်းတွင်းသို့ဝင်ကာ၊အိပ်ယာပေါ်တွင်
ပက်လက်လှန်ရင်း၊တောင်တောင်အီ အီအတွေးပွားနေစဉ်မှာပင်၊ ကျွန်တော့်အခန်းတံခါးကိုခပ်တိုးတိုးခေါက်သံပေါ်လာပြန်သည်။
တံခါးကိုအသာဖွင့်ပေ့းလိုက်သည့်အခါ၊ကျွန်တော်တွေးထင်ထားသည့်
အတိုင်းသူမပင်ဖြစ်နေသည်။ကလေးပွေ့လျက်နှင့်ပင်ဖြစ်၏။
သူ့စကားသံသည်ကျွန်တော့်နားထဲသို့သံရည်ပူလောင်းထည့်လိုက်သလို
ဝင်လာသည်။
“အကို။ညီမလမ်းစားရိတ်ပြတ်နေလို့၊ညီမနဲ့တညလောက်နေပါနော်..”၊တဲ့။
ဗုဒ္ဓေါ၊မြတ်စွာဘုရား။
အကြီးအကျယ်စိတ်ဆင်းရဲသွားသောကျွန်တော်သည် တံခါးရွက်ကိုလက်တဖက်ဖြင့်ကိုင်ရင်း…၊
“ဖြစ်မှဖြစ်ရလေငါ့ညီမရယ်။ညည်းလှုပ်ရှားနေတာငါအကုန်မြင်ပါတယ်။
ငါဟာဟိုစိတ်ဒီစိတ်ဘယ်လောက်ရှိရှိ ညည်းလိုသွေးနုနုသားနုနု၊ ကိုယ့်ညီမအရွယ်နဲ့ငါဘယ်လိုလုပ်ပျော်နိုင်ပါ့မလဲ။ပြီးတော့တည်းခိုခန်း
ပိုင်ရှင်ကလည်း ညည်းကို၊သံသယရှိပုံရတယ်။ ညည်းလုပ်နေတာကို၊မတော်တဆများပိုင်ရှင်တွေလက်ပူးလက်ကြပ်မိ
သွားရင် ညည်းအရှက်ရလိမ့်မယ်။ကလေးရဲ့ရှေ့ရေးလည်းရှိသေးတယ်လေ”
သူမသည်ညှိုးငယ်သောမျက်နှာဖြင့်ကြမ်းပြင်ကိုစိုက်ကြည့်ရင်း၊ချာကနဲ
လှည့်ထွက်သွားလေသည်။ထိုညက ကျွန်တော်တညလုံး အိပ်မပျော်ချေ။မိုးလင်းလျှင်ဖြင့်သူမကိုလမ်းစားရိတ်အဖြစ်နှစ်ထောင်
သုံးထောင်ခန့်၊ဘေးလူတစုံတရာမရိပ်မိအောင်ပေးလိုက်ဦးမည်ဟု
စိတ်ကူးထားသော်ငြား၊နောက်တနေ့မနက်ကျွန်တော်အိပ်ယာထချိန်တွင်၊
တည်းခိုခန်းမှသူမထွက်ခွာသွားခဲ့လေပြီ။
ထိုကာလများကသော်၊ပျဉ်းမနားတောင်ညိုတဝိုက်တွင်၊တိုးမပေါက်သော
သစ်တောကြီးများရှိခဲ့ဖူးလေ၏။ယခုသော်အဆိုပါအရပ်၌၊ဓာတ်မီးရောင်ရှိန်
ထိန်ထိန်လင်းလျက်ရှိသည့်ဆယ့်ခြောက်လမ်းသွားလမ်းမကြီးများ၏
ဝဲယာတွင်လွှတ်တော်၊ဟိုတယ်၊ကုန်တိုက်ကြီးများဖြင့်စည်ကားနေပြီဟု
ဆိုပါသည်။ပျဉ်းမနားဟူသောအမည်သည်ပင်နေပြည်တော်ဟူ၍ခေါ်ဝေါ်
သမှုပြုနေကြလေပြီ။
ခေတ်စနစ်တို့သည်လည်း၊ပြောင်းလဲတန်သလောက်ပြောင်းခဲ့ လေပြီ။
ပျဉ်းမနားမြို့ကြီးအလွန်တရာစည်ကားတိုးတက်ပြောင်းလဲနေသော၊
ယခုအခါသမယတွင်၊သူမဘယ်ဆီ၊ဘယ်ဘဝရောက်နေပါလေသနည်း။
(၆)
ပြည့်တန်ဆာအကြောင်း၊ညဥ့်ငှက်တို့နှင့်ကြုံလေဆုံလေတိုင်း၊သူတို့၏
ဘဝအကြောင်းခြင်းရာတို့ကိုမြင်တွေ့ဖတ်ရှုရလေတိုင်း၊ကျွန်တော်သူမကို
သတိရမိသည်ချည်းဖြစ်၏။ပြည့်တန်ဆာဖြစ်ရသည်တွင်မှ၊၊သူမ၏ဘဝသည်
မျက်နှာငယ်ရပေစွ။သွေးနုသားနုအချိန်မှာပင်၊ခရီးစားရိတ်နှင့်တလုပ်တဝမ်း
အတွက်၊မရှက်မကြောက်ရုန်းကန်ခဲ့ရလေခြင်း။
သူမလိုဘဝမျိုးကျွန်တော်တို့နိုင်ငံတွင်၊အရေအတွက်မည်မျှ ကျရောက်ကုန်ခဲ့ကြလေပြီနည်း။တရုပ်ပြည်သို့ဇနီးမယားဈေးကွက်အလို့ငှာ၊
အဘယ်မျှသောအရေအတွက်ရောက်ရှိနေကြလေကုန်သနည်း။
ထို့အတူ..၊ယိုးဒယား၊မလေးရှား၊စင်္ကာပူတို့ဆီသို့….။
သြော်…၊သည်အချိန်ဆိုရင်ဖြင့်သူ့ရင်သွေးကလေးငယ်ပင်၊အသက်သုံးဆယ်
အရွယ်ရှိချေတော့မည်။သည်ကလေးတဖက်နှင့်၊သူမသည်သူ့ဘဝရှေ့ခရီးကို
မည်သို့မည်ပုံဆက်၍လျှောက်လှမ်းနေခဲ့ပါသနည်း။
သူမ၏ရင်သွေးငယ်လူမွှေးလူတောင်မှပြောင်ပါလေစ။မည်သို့ဆိုစေ
ယခုခေတ်သစ်ကြီးတွင်၊အဆိုပါကလေးငယ်ကိုလူရာဝင်သောဘဝ၌
ရောက်စေ၊ရှိစေလိုသောစိတ်ဆန္ဒသည်၊သူမအကြောင်းကို
စဉ်းစားမိလေတိုင်း၊ကျွန်တော့်စိတ်အစဉ်တွင်ထပ်ချပ်မကွာ
ပေါ်လာမိသည်ချည်းပင်ဖြစ်လေ၏။ ။

သရုပ်ဖော်။ ။ဖေသစ်တည်။
၁၀ ဇူလိုင် ၂၀၁၆ နေ့ထုတ် သည်ဗွိုက်ဒေးလီးစ်နေ့စဉ်သတင်းစာမှ။ ။

0 comments:

Post a Comment

စာမရေးဖြစ်တော့တာကြောင့် ကျနော်ကြိုက်ပြီး ဖတ်စေချင်တဲ့စာလေးတွေကို တင်ထားပါတယ်ဗျာ

Followers

Total Pageviews

အမှာပါးစရာများရှိနေရင်

Pop up my Cbox

Blog Archive

အက်ဒမင်

ရှာဖွေလေ တွေ့ရှိလေ

စာပေမြတ်နိုးသူများ

free counters
Related Posts Plugin for WordPress, Blogger...